O CANTAR DA MARUXIÑA
-Boas tardes, Maruxiña,
vouche decir unha cousa:
si tu me queres a min,
eu non me caso con outra.
-Que te quero ben o sabes,
non precisas preguntalo;
hai un ano que che dixen
que me quería casar.
-Tu tomáchelo a risa,
pero dígocho de veras,
que ando buscando muller
e non topo quen me queira.
-Pois se ningunha te quere,
será porque tu eres malo
ou porque che teñan medo
que non cumples o traballo.
-Eu por malo non me teño
e menos por folgazán,
solamente que as rapazas
dicen que son un larchán.
-Si cho dicen non se engañan
porque tu eres un babullas;
andas xogando con todas
e non cumples con ningunha.
-Todo eso éche mentira,
solo é por pasar o tempo;
tu eres a máis preferida
que teño no pensamento.
-Tu non me veñas con contos
porque eu non che fago caso
nin quererme como as outras
pra me faguer outro tanto.
-Tu non te fías de min
ieu contigo hei ser formal;
dáme un bico, Maruxiña,
non me fagas rabexar.
-Ahora, pídesme un bico,
despois, pídesme un abrazo
e así que pouquiño a pouco
vas entrando no palacio.
-Por un bico que che pido,
xa te pos tan enfadada;
¿que farías se che pedira
o que levas con tanta gracia?
-Teño un xuramento feito,
que mentras que esté solteira
nin ti nin ningún bribón
me ha ver a chocolateira.
(Da Cega de Aciveiro)